યંગ ઇન્ડિયન્સના અમદાવાદ ચેપ્ટર દ્વારા 15 ઓક્ટોબરે ગરબા યોજાશે; દરેક ગરબા પાસના વેચાણ સામે ઓછામાં ઓછું એક વૃક્ષ વાવવાની પહેલ, વેસ્ટ મેનેજમેન્ટ અને કાર્બન ઉત્સર્જન ઘટાડવા પર ભાર અપાશે
અમદાવાદ, ગુજરાત | ૧૪ ઓક્ટોબર ૨૦૨૬ | નવરાત્રિના ઉત્સવને પર્યાવરણને અનુકૂળ અને વધુ જવાબદાર બનાવવાના ઉદ્દેશ સાથે યંગ ઇન્ડિયન્સ (Yi)ના અમદાવાદ ચેપ્ટર દ્વારા 15 ઓક્ટોબરે વાર્ષિક ગરબા મહોત્સવનું આયોજન કરવામાં આવશે. આ વર્ષે ગરબા મહોત્સવની મુખ્ય થીમ ક્લાઇમેટ એક્શન એટલે કે આબોહવા પરિવર્તન સામે પગલાં લેવાની રહેશે. આ પહેલ અંતર્ગત વેસ્ટ મેનેજમેન્ટ, વૃક્ષારોપણ, રિસાઇક્લિંગ અને જવાબદાર પરિવહન જેવા ઉપાયો દ્વારા ઉત્સવની પર્યાવરણ પર થતી અસર ઘટાડવા પ્રયાસ કરવામાં આવશે.
આ પહેલને અમદાવાદનો પ્રથમ ઓપરેશનલ નેટ-ઝીરો ગરબા ગણાવવામાં આવ્યો છે. કાર્યક્રમ દરમિયાન ઉત્સવથી સર્જાતા કાર્બન ફૂટપ્રિન્ટનું માપન કરવા તેમજ પર્યાવરણ પર થતી તેની અસર ઘટાડવા અને બાકી રહેલી અસરને સરભર કરવા માટે લક્ષિત પગલાં લેવાનું આયોજન છે. યંગ ઇન્ડિયન્સ અમદાવાદનો ઉદ્દેશ નાગરિકોમાં પર્યાવરણ પ્રત્યે સભાનતા વધારવાનો અને રોજિંદા જીવનમાં પણ પર્યાવરણને અનુકૂળ વિકલ્પો અપનાવવા પ્રોત્સાહિત કરવાનો છે.
યંગ ઇન્ડિયન્સ અમદાવાદના ચેરપર્સન દર્શન પરીખે જણાવ્યું હતું કે, “નવરાત્રિ ગુજરાતના સૌથી ઉત્સાહભર્યા તહેવારોમાંનો એક છે, જેમાં મોટી સંખ્યામાં લોકો એકત્રિત થાય છે. તેથી આબોહવા પરિવર્તન સામે વ્યવહારુ પગલાં લેવા માટે લોકોને પ્રેરિત કરવાની આ એક ઉત્તમ તક છે. આ પહેલ દ્વારા અમે દર્શાવવા માગીએ છીએ કે ઉત્સવની ઉજવણી ઉત્સાહપૂર્ણ, સર્વસમાવેશી અને પર્યાવરણ પ્રત્યે જવાબદાર પણ બની શકે છે. અમને આશા છે કે લોકો આ કાર્યક્રમ પૂરતી જ નહીં, પરંતુ રોજિંદા જીવનમાં પણ આવી આદતો અપનાવશે.”
દરેક ગરબા પાસ સામે એક વૃક્ષનું વાવેતર
પર્યાવરણ સંરક્ષણની દિશામાં આ પહેલના ભાગરૂપે વેચાયેલા દરેક ગરબા પાસ સામે ઓછામાં ઓછું એક વૃક્ષ વાવવાનું આયોજન કરવામાં આવ્યું છે. આ ઉપરાંત, શહેરના વિવિધ વિસ્તારોમાં ઇ-વેસ્ટ એટલે કે ઇલેક્ટ્રોનિક કચરો અને જૂની પરંતુ ઉપયોગમાં લઈ શકાય તેવી ઘરવપરાશની વસ્તુઓ એકત્રિત કરવા માટે ડ્રાઇવ યોજવામાં આવશે. આ પ્રવૃત્તિઓ દ્વારા વસ્તુઓનો પુનઃઉપયોગ અને રિસાઇક્લિંગ વધારવાનો પ્રયાસ કરવામાં આવશે.
ગરબાના સ્થળે ખાદ્ય કચરા અને અન્ય જૈવિક કચરાનું અલગ-અલગ વર્ગીકરણ કરવામાં આવશે અને તેને કમ્પોસ્ટિંગ માટે મોકલવામાં આવશે. વધારાનું યોગ્ય અને ઉપયોગમાં લઈ શકાય તેવું ભોજન બિનસરકારી સંસ્થાઓ (NGO)ના સહયોગથી જરૂરિયાતમંદ લોકો સુધી પહોંચાડવામાં આવશે. આ વ્યવસ્થા દ્વારા ખાદ્યપદાર્થોનો બગાડ ઘટાડવા પર ભાર મૂકવામાં આવશે.
કાર્યક્રમમાં ડેકોરેશન પણ સાદું અને પુનઃઉપયોગ કરી શકાય તેવી સામગ્રીથી તૈયાર કરવાનું આયોજન છે. તેના કારણે સંસાધનોનો વપરાશ ઘટાડવાની સાથે બિનજરૂરી કચરો પેદા થતો અટકાવી શકાશે.
કાર્બન ઉત્સર્જન ઘટાડવા શેરિંગ ટ્રાન્સપોર્ટેશનને પ્રોત્સાહન
કોઈપણ મોટા કાર્યક્રમના કાર્બન ફૂટપ્રિન્ટમાં પરિવહનનો નોંધપાત્ર હિસ્સો હોઈ શકે છે. આ બાબતને ધ્યાનમાં રાખીને ગરબામાં ભાગ લેનાર લોકોને શક્ય હોય ત્યાં સુધી કારપૂલિંગ અથવા શેરિંગ ટ્રાન્સપોર્ટેશનનો ઉપયોગ કરવા પ્રોત્સાહિત કરવામાં આવશે. એક જ વાહનમાં વધુ લોકો મુસાફરી કરે તેવા વિકલ્પો અપનાવવાથી વાહનોની સંખ્યા અને તેના કારણે થતા કાર્બન ઉત્સર્જનમાં ઘટાડો કરવામાં મદદ મળી શકે છે.
પરંપરાગત ગરબાની ઉજવણી સાથે પર્યાવરણલક્ષી વ્યવહારોને જોડીને યંગ ઇન્ડિયન્સ અમદાવાદ શહેરમાં વધુ જવાબદાર અને ટકાઉ કાર્યક્રમોની સંસ્કૃતિ વિકસાવવા માગે છે. કચરાનું યોગ્ય વ્યવસ્થાપન, સંસાધનોનો પુનઃઉપયોગ અને ઉત્સર્જનમાં ઘટાડા જેવા વ્યવહારુ ઉપાયો દ્વારા નાગરિકોની ભાગીદારીથી પર્યાવરણ સંરક્ષણને લોકચળવળ બનાવવાનો આ પહેલનો હેતુ છે.
આ ગરબા મહોત્સવનું આયોજન અમદાવાદમાં સાયન્સ સિટી સર્કલ નજીક આવેલા સેવન સીઝ પાર્ટી પ્લોટ ખાતે કરવામાં આવશે.
== સમાપ્ત ==
