MICA નું DNA એવું છે કે તમે જે ક્ષેત્ર પસંદ કરો તેમાં તમને અનોખા બનાવશે: જયા દેશમુખ
અમદાવાદ, ગુજરાત | ૦૪ એપ્રિલ ૨૦૨૬ — MICA, ધ સ્કૂલ ઓફ આઈડિયાઝે શનિવારે તેનું 31મું કન્વોકેશન યોજ્યું, જેમાં તેના મુખ્ય કાર્યક્રમોમાં અભ્યાસ કરેલા 255 વિદ્યાર્થીઓને ડિપ્લોમા, સર્ટિફિકેટ અને ફેલોશિપ આપવામાં આવ્યા. ગ્રેજ્યુએટ થયેલા વિદ્યાર્થીઓમાં Post Graduate Diploma in Management – Communications (PGDM-C) ના 152, Post Graduate Diploma in Management (PGDM) ના 49, Crafting Creative Communications (CCC) કાર્યક્રમના 48 અને Fellow Programmed in Management (FPM) ના 6 સંશોધકોનો સમાવેશ થાય છે.
ટાટા સ્ટારબક્સના ચીફ એક્ઝિક્યુટિવ ઓફિસર સુશાંત દાસ કન્વોકેશનના મુખ્ય અતિથિ રહ્યા હતા. આ કાર્યક્રમમાં MICA ની ગવર્નિંગ કાઉન્સિલના સભ્યો, ફેકલ્ટી, એલ્યુમ્નાઈ અને ગ્રેજ્યુએટ થયેલા વિદ્યાર્થીઓના પરિવારજનો હાજર રહ્યા હતા.
સ્વાગત ભાષણ આપતાં MICA ના Director અને CEO જયા દેશમુખે ટેક્નોલોજી અને સમાજમાં થતાં પરિવર્તનોને ધ્યાનમાં રાખીને સંસ્થાની વિકસતી દ્રષ્ટિ રજૂ કરતા જણાવ્યું કે, “જ્યારે આર્ટિફિશિયલ ઇન્ટેલિજન્સ જીવનના દરેક ક્ષેત્રમાં પ્રવેશી રહી છે, ત્યારે દુનિયા હવે ‘કલ્પનાશક્તિના યુગ’ તરફ આગળ વધી રહી છે. અમારી ભૂમિકા એવા ક્રિએટિવ વિચારકોને તૈયાર કરવાની છે, જે આ ભવિષ્યને આકાર આપી શકે.” તેમણે ઉમેર્યું કે કન્વોકેશન વિદ્યાર્થીઓ માટે વિચાર અને નવી શરૂઆત બંનેનું પ્રતીક છે. “MICA નું DNA એવું છે કે તમે જે ક્ષેત્ર પસંદ કરો તેમાં તમને અનોખા બનાવશે,” એમ તેમણે કહ્યું અને વિદ્યાર્થીઓને સંસ્થાના મૂલ્યો – જિજ્ઞાસા, સહાનુભૂતિ અને લચીલાપણું – આગળ વધારવા પ્રોત્સાહિત કર્યા.
ગત વર્ષની મુખ્ય સિદ્ધિઓ અંગે વાત કરતાં તેમણે “MICA Lens” પર આધારિત નવા શૈક્ષણિક માળખાની શરૂઆત અંગે માહિતી આપી, જેમાં સર્જનાત્મકતા, સંસ્કૃતિ, સંચાર, વેપાર અને સમુદાયનો સમાવેશ થાય છે. તેમણે શૈક્ષણિક કાર્યક્રમોમાં વધારાની વાત કરતાં બ્રાન્ડ મેનેજમેન્ટ, સેલ્સ અને સીઆરએમ, પ્રોડક્ટ મેનેજમેન્ટ, બિઝનેસ વિશ્લેષણ અને કન્સલ્ટિંગ અને ડેટા સાયન્સ અને એનાલિટિક્સ જેવા નવા સ્પેશિયલાઈઝેશન તથા FMCG, મીડિયા અને મનોરંજન અને ફાઇનાન્સિયલ સર્વિસીસ જેવા ક્ષેત્રોમાં ધ્યાન કેન્દ્રિત કરાયું હોવાની નોંધ લીધી. તેમણે પ્લેસમેન્ટના સુધારેલા પરિણામોની વાત કરતાં જણાવ્યું કે સમર ઇન્ટર્નશિપ સ્ટાઇપેન્ડ માં 17 ટકા વધારો અને ફાઈનલ પ્લેસમેન્ટમાં લગભગ 7 ટકા વૃદ્ધિ નોંધાઈ છે, જે ઉદ્યોગ સાથે મજબૂત જોડાણ દર્શાવે છે.
મુખ્ય અતિથિ સુશાંત દાસે ગ્રેજ્યુએટ વિદ્યાર્થીઓને સંબોધતાં સુસંગતતા, સહયોગ અને વાસ્તવિક દુનિયાની અસર વિશે વાત કરતા કહ્યું કે, “બજાર ક્યારેકની તેજસ્વિતા માટે ઇનામ આપતું નથી, તે સતત પ્રદર્શનને મહત્વ આપે છે, શ્રેષ્ઠતા અનુશાસન અને સતત પ્રયત્નોથી પ્રાપ્ત થાય છે.” તેમણે વિચારોને પરિણામોમાં ફેરવવાની જરૂરિયાત ઉપર ભાર મૂકતાં કહ્યું, “પ્રભાવ વિના સર્જનાત્મકતા માત્ર શણગાર છે. જો તમે વિચારોને પરિણામમાં ફેરવી શકો, તો તમે અલગ ઓળખ ઉભી કરી શકશો.” ટેકનોલોજીની વધતી ભૂમિકા અંગે તેમણે કહ્યું, “AI તમને વિકલ્પો આપશે, પરંતુ યોગ્ય પસંદગી કરવી તમારી જવાબદારી છે,” અને નિર્ણય લેવામાં સ્પષ્ટતા અને સમજણનું મહત્વ દર્શાવ્યું.
કન્વોકેશન સમારોહમાં શૈક્ષણિક અને સર્જનાત્મક સિદ્ધિઓ માટે એવોર્ડ્સ પણ આપવામાં આવ્યા અને Year Book 2025–26 નું અનાવરણ કરવામાં આવ્યું, જેમાં ગ્રેજ્યુએટ બેચની સિદ્ધિઓ અને અનુભવોને રજૂ કરવામાં આવ્યા છે.
