બે દિવસીય આંતરરાષ્ટ્રીય પરિષદમાં સંશોધકો, શિક્ષણવિદો અને ઉદ્યોગજગતના નિષ્ણાતો એક મંચ પર એકત્રિત થઈ બુદ્ધિશાળી પ્રણાલીઓ અને ટકાઉ નવીનતા અંગે ચર્ચા વીચારણા કરશે
ગાંધીનગર, ગુજરાત | ૦૯ ઓક્ટોબર ૨૦૨૬ | ટકાઉ ભવિષ્યના નિર્માણમાં ઉભરતી ટેક્નોલોજી અને નવી પેઢીની ડિઝાઇનની ભૂમિકા અંગે ચર્ચા કરવા માટે કર્ણાવતી યુનિવર્સિટી ખાતે શુક્રવારે ઇન્ટરનેશનલ કોન્ફરન્સ ઑન કન્વર્જિંગ ઇન્ટેલિજન્સ 2026 CICON 2026નો પ્રારંભ થયો હતો. આ પરિષદમાં શિક્ષણવિદો, સંશોધકો, ડિઝાઇનરો અને ઉદ્યોગજગતના વ્યાવસાયિકો એકત્રિત થયા હતા.
9 અને 10 ઑક્ટોબરના રોજ કર્ણાવતી યુનિવર્સિટી ખાતે યોજાઈ રહેલી આ પરિષદની થીમ ‘કન્વર્જિંગ ઇન્ટેલિજન્સ: ટકાઉ ભવિષ્ય માટે નવી પેઢીની ડિઝાઇન અને ટેક્નોલોજી’ રાખવામાં આવી છે. ઇન્સ્ટિટ્યૂટ ઑફ ઇલેક્ટ્રિકલ એન્ડ ઇલેક્ટ્રોનિક્સ એન્જિનિયર્સ IEEEના ગુજરાત વિભાગ દ્વારા આ પરિષદને ટેકનિકલ સહ-પ્રાયોજક તરીકે સહયોગ આપવામાં આવ્યો છે.
આ પ્રસંગે વિજ્ઞાન અને ટેક્નોલોજી વિભાગનાં સચિવ પી. ભારતી મુખ્ય અતિથિ તરીકે ઉપસ્થિત રહ્યાં હતાં. જ્યારે IEEE ગુજરાત વિભાગના અધ્યક્ષ ડૉ. ચિરાગ પૌનવાલા, હાર્મન ઇન્ટરનેશનલના ડિરેક્ટર અને DSP એન્જિનિયરિંગ મેનેજર ડૉ. શૈલેષ સાકરી તથા કર્ણાવતી યુનિવર્સિટીના પ્રમુખ શ્રી રિતેશ હડા સન્માનનીય અતિથિઓ તરીકે ઉપસ્થિત રહ્યા હતા.
આ પરિષદનો મુખ્ય ઉદ્દેશ આર્ટિફિશિયલ ઇન્ટેલિજન્સ AI, મશીન લર્નિંગ, ઇન્ટરનેટ ઑફ થિંગ્સ IoT, બ્લોકચેઇન, સ્માર્ટ મટિરિયલ્સ, માનવકેન્દ્રિત ડિઝાઇન અને સર્ક્યુલર ઇકોનોમી જેવા વિવિધ ક્ષેત્રોમાં સંશોધન અને વિચારોના આદાનપ્રદાન માટે આંતરવિષયક મંચ પૂરું પાડવાનો છે. આ ક્ષેત્રો વચ્ચેના સમન્વય દ્વારા ટકાઉપણું, સર્વસમાવેશકતા અને ટેક્નોલોજીના જવાબદાર વિકાસને કેવી રીતે પ્રોત્સાહન આપી શકાય, તેના પર પરિષદમાં વિશેષ ધ્યાન કેન્દ્રિત કરવામાં આવશે.
આ ઉદ્ઘાટન પ્રસંગે કર્ણાવતી યુનિવર્સિટીનાં ડીન ઑફ એકેડેમિક્સ ડૉ. કુસુમ અગ્રવાલે જણાવ્યું હતું કે, “CICON 2026 ડિઝાઇન અને ટેક્નોલોજીને એક મંચ પર લાવવાનું કાર્ય કરે છે. આ મંચ સંશોધકો અને વ્યાવસાયિકોને પોતાના ક્ષેત્રની મર્યાદાઓથી આગળ વિચારી, વિવિધ વિદ્યાશાખાઓની સંયુક્ત ક્ષમતાનો ઉપયોગ કરીને વાસ્તવિક જીવનના પડકારોનો ઉકેલ શોધવા પ્રેરિત કરે છે. અમારો ઉદ્દેશ એવા ઉકેલો વિકસાવવાનો છે, જે માત્ર ટેક્નોલોજીની દૃષ્ટિએ અદ્યતન જ નહીં, પરંતુ સર્વસમાવેશક અને માનવજરૂરિયાતોને કેન્દ્રમાં રાખનારા પણ હોય.”
IEEE ગુજરાત વિભાગના અધ્યક્ષ ડૉ. ચિરાગ પૌનવાલાએ જણાવ્યું હતું કે, “બુદ્ધિશાળી પ્રણાલીઓ અને ડિઝાઇન વચ્ચેનો સમન્વય નવી સંભાવનાઓનાં દ્વાર ખોલી રહ્યો છે. CICON જેવા મંચો શિક્ષણજગત અને ઉદ્યોગજગતને જ્ઞાનના આદાનપ્રદાન, ઉભરતા પડકારો અંગે ચર્ચા અને નવી ટેક્નોલોજીના ઉપયોગની સંભાવનાઓ શોધવાની તક પૂરી પાડે છે. નવીનતાને વેગ આપવા અને સંશોધનને વ્યવહારુ ઉપયોગમાં પરિવર્તિત કરવા માટે આ પ્રકારનો સહયોગ મહત્ત્વપૂર્ણ છે.”
પરિષદમાં વિવિધ વિષયોના નિષ્ણાતો દ્વારા મુખ્ય વક્તવ્ય સત્રોનું આયોજન કરવામાં આવ્યું છે. તેમાં આસામ સ્કિલ યુનિવર્સિટીના ઇલેક્ટ્રિકલ એન્જિનિયરિંગ વિભાગના પ્રોફેસર અને વડા ડૉ. વિકાસ સિંહ ભદોરિયા; IIT જોધપુરના કમ્પ્યુટર સાયન્સ એન્ડ એન્જિનિયરિંગ વિભાગના વડા તથા જેનપેક્ટ ચેર પ્રોફેસર પ્રો. અને ડૉ. ગૌરવ હરિત; અને ગાંધીનગર સ્થિત ધીરુભાઈ અંબાણી યુનિવર્સિટીના કમ્પ્યુટર સાયન્સના પ્રોફેસર ડૉ. માણિકલાલ દાસ મુખ્ય વક્તા તરીકે ઉપસ્થિત રહેશે.
પરિષદના ટેકનિકલ સત્રોમાં કૃત્રિમ બુદ્ધિમત્તા અને ડેટા સાયન્સ, માનવકેન્દ્રિત ડિઝાઇન, સાયબર સુરક્ષા, કમ્પ્યુટિંગ અને સંચાર ટેક્નોલોજી, સ્માર્ટ સિસ્ટમ્સ, આરોગ્યસંભાળ, ગતિશીલતા અને પરિવહન તેમજ ડિઝાઇન ટેક્નોલોજીનાં સાંસ્કૃતિક, સામાજિક અને નૈતિક પાસાઓ જેવા વિષયોનો સમાવેશ થાય છે.
આ પરિષદનો ઉદ્દેશ વિવિધ વિદ્યાશાખાઓ વચ્ચે સહયોગને પ્રોત્સાહન આપવા સાથે સમાજ અને પર્યાવરણ સામે ઊભા થઈ રહેલા પડકારોનો સામનો કરી શકે તેવી ટેક્નોલોજીના વિકાસને વેગ આપવાનો છે.
== સમાપ્ત ==
